September 26, 2021

च्यालेन्ज नेपाल

यो पोस्टको बारेमा पुरा विवरण हेर्न यहाँ थिच्नुहोस

म्यान्मारमा निषेधाज्ञा तोड्दै प्रदर्शन

म्यान्मारस्थित अमेरिकी दूतावासले लोकतन्त्रवादी नेतृ आङ सान सुचीसँग भेट्न गरेको अनुरोध सैनिक सरकारद्वारा अस्वीकार

यांगुन/नेइपिडअ — सैनिक ‘कु’ को विरोधमा म्यान्मारमा लोकतन्त्र पक्षधरहरूले मंगलबार निषेधाज्ञा तोड्दै प्रदर्शन गरेका छन् । सोमबार रातिदेखि जारी गरिएको कर्फ्यु तथा ५ जनाभन्दा बढी एकै स्थानमा भेला हुन नपाउने नियमका बाबजुद राजधानी नेइपिडअ, मुख्य सहर यांगुन, म्यान्डले बागोलगायतमा मंगलबार विरोध प्रदर्शन जारी छ । ती सहरहरूमा दसौं हजार प्रदर्शनकारीहरू सडकमा उत्रेर सैनिक शासनको विरोध गरेका छन् । पछिल्ला प्रदर्शनमा युवाको उल्लेख्य सहभागिता रहेको जनाइएको छ ।
नेइपिडअमा मंगलबार भएका प्रदर्शनमा प्रहरी अधिकारीहरूले चेतावनीस्वरूप हवाई फायर गर्नुका साथै पानीका फोहरा हानेका छन् । त्यसलगत्तै प्रहरीले रबरका गोली हानेका एक प्रदर्शनकारीलाई उल्लेख गर्दै समाचार संस्था एएफपीले जनाएको छ । पानीका फोहरा तथा रबरको गोलीका कारण घाइते भएकाहरूलाई उपचारका लागि अस्पताल भर्ना गरिएको छ । प्रहरीले दमन सुरु गरेपछि भने प्रदर्शनकारीले ‘सैनिक तानाशाह अन्त्य गर’ भन्दै नाराबाजी गरेका थिए । सेना प्रमुख मिन आङ ह्लाइङले सोमबार राति देशवासीका नाममा सम्बोधन गरेका छन् ।

राज्य नियन्त्रित टेलिभिजनबाट सम्बोधन गर्दै उनले संविधानअनुसार नै शासनसत्ता नियन्त्रणमा लिएको दाबी गरेका बीबीसीले जनाएको छ । ‘देशलाई सही मार्गमा लैजान सेनाले कदम चालेको’ दाबी गर्दै ह्लाइङले सैनिक कदमको समर्थन गर्न जनतालाई आग्रह गरेका छन् । सम्बोधनका क्रममा उनले नोभेम्बरको चुनावमा भएका धाँधलीबारे निष्पक्ष छानबिन गरिने तथा वर्ष दिनभित्र चुनाव गरी निर्वाचित सरकारलाई सत्ता हस्तान्तरण गरिने जनाएका छन् । देशका प्रमुख सहरहरूमा भएको प्रदर्शनसँगै नागरिक अवज्ञा पनि सुरु भएको छ । चिकित्सकहरूले सुरु गरेको नागरिक अवज्ञामा विभिन्न मन्त्रालय तथा विभागका हजारौं कर्मचारीसमेत सहभागी भएका छन् । तीमध्ये अधिकांशले काम बहिष्कार गरेका बीबीसीले उल्लेख गरेको छ । सरकारी सञ्चारमाध्यममा कार्यरत केही सञ्चारकर्मीले पनि काम बहिष्कार गरेका छन् । नागरिक अवज्ञा आह्वानअन्तर्गत काम बहिष्कार गर्नेलाई सरकारले जागिर बर्खास्त गरे उनीहरूलाई आर्थिक सहयोग गर्नका लागि छुट्टै कोष बनाइएको अधिकार्मीहरूले बताएका छन् । नेइपिडअमा मंगलबार एक प्रहरी अधिकारीले नागरिक अवज्ञा गर्दै प्रदर्शनकारीसँग मिलेका छन् ।

सैनिक मुख्यालय अगाडि गरिएको विरोध प्रदर्शनमा प्रहरीले भीडलाई तितरबितर पार्न पानीको फोहरा प्रयोग गरिरहेको बेला उनले आफू प्रजातन्त्रका लागि प्रदर्शनकारीसँग मिलेको जनाएका हुन् । त्यसैगरी, यांगुन विश्वविद्यालयका प्राध्यापक र विद्यार्थीले अमेरिकी दूतावासअगाडि सैनिक सरकारको विरोधमा प्रदर्शन गरेका थिए । म्यान्मारस्थित अमेरिकी दूतावासले आङ सान सुचीसँग भेट्न गरेको अनुरोध सैनिक सरकारले अस्वीकार गरिदिएको छ । यसअघि म्यान्मारस्थित अमेरिकी दूतावासले सेनालाई सत्ता परित्याग गरी लोकतान्त्रिक प्रक्रियाबाट निर्वाचित सरकारको पुनर्वहाली गर्न, नजरबन्दमा रहेका नेताहरूलाई रिहा गर्न र सञ्चार क्षेत्रका अवरोध हटाउन आग्रह गरेको थियो । लोकतान्त्रिक ढंगबाट चुनिएको सरकारको पक्षमा जनताले शान्तिपूर्ण प्रदर्शन गर्न पाउने अधिकारको पक्षमा अमेरिका रहेको दूतावासले ट्वीटमार्फत जनाएको थियो ।

प्रदर्शनकारीहरूले सैनिक नियन्त्रणमा रहेकी लोकतन्त्रवादी नेतृ आङ सान सुचीसहित उनको दल नेसनल लिग फर डेमोक्रेसी (एनएलडी) नेताहरूको रिहाइको माग गरिहरेका छन् । सोमबार साँझसम्म करिब डेढ सय जना नियन्त्रणमा रहेको जनाएको भए पनि मंलबार थप केही अभियन्ता, मावन अधिकारकर्मी, नेता तथा प्रदर्शनकारीलाई प्रहरीले पक्राउ गरेको एनएलडीले जनाएको छ । म्यान्मारमा गत नोभेम्बरमा भएको चुनावमा एनएलडीले ८० प्रतिशतभन्दा बढी मत ल्याएको थियो । तर उक्त चुनावमा व्यापक धाँधली भएको सेनाको दाबी छ । सैनिक ‘कु’ सँगै सेनाले नेतृ सुची तथा राष्ट्रपति विन मिन्टलाई नियन्त्रणमा लिएको थियो । सुचीको पछिल्लो अवस्थाबारे सैनिक नेतृत्वले आधिकारिक रूपमा हालसम्म कुनै जानकारी गराइसकेको छैन । स्रोत रासस
आफ्नै मोबाइलबाट पैसा पठाउने तरिका सिक्नुहोस तलको भिडियो हेरेर