प्रचण्डले सपनामा पनि प्रधानमन्त्रीको कुर्सीमात्रै देख्छन् : शंकर पोखरेल

समाचार

लुम्बिनी प्रदेशका मुख्यमन्त्री शंकर पोखरेलले पुष्पकमल दाहाल ‘प्रचण्ड’ले सपनामा पनि प्रधानमन्त्रीको कुर्सी मात्रै देख्ने गरेको आरोप लगाएका छन्।

नेपाल कम्युनिष्ट पार्टी (नेकपा) ओली समूहले बिहीबार प्युठानमा आयोजना गरेको जिल्लास्तरीय अगुवा कार्यकर्ता भेलालाई सम्बोधन गर्दै मुख्यमन्त्री पोखरेलले कार्यकारी अध्यक्षले संगठन निर्माणमा ध्यान दिन छोडेर प्रधानमन्त्रीको कुर्सीमात्रै ताकेको हुँदा समस्या भएको बताए।

‘भदौमा दुई अध्यक्षका बीचमा भएको सहमति अनुसार प्रचण्डलाई पार्टीको काम हेर्ने गरी कार्यकारी अधिकार दिइएको थियो, तर उहाँ सधैं बालुवाटार जानुभो र सरकारमा मात्रै ध्यान दिनु भो,’ मुख्यमन्त्री पोखरेलले भने, ‘कार्यकारी अध्यक्षले चैतमा महाधिवेशन गर्न तयारी गर्नुपर्ने होइन, तर उहाँले त्यो सबै छोडेर प्रधानमन्त्रीको कुर्सीमा मात्रै ध्यान केन्द्रित गर्नु भो र पार्टीमा समस्या उत्पन्न भयो।’

त्यस्तै, पोखरेलले अख्तियारमा मान्छे आए आफूले कारबाही भोग्नुपर्छ भन्ने त्रासले संवैधानिक नियुक्ति गर्न नदिएको आरोप लगाए।
संवैधानिक नियुक्ति गर्नुपर्छ भन्ने केपी अलोकतन्त्रिक हुन् कि त्यो रोक्न खोज्नेहरू?,’ पोखरेलले प्रश्न गरे, ‘निर्वाचनमा जाऊँ, जनतामा जाऊँ भन्नेहरू लोकतन्त्रवादी हुन् कि जानुहुन्न भन्नेहरू हुन्?’
उनले अहिले पनि लोकतन्त्रका सबै अवयवहरू चलायमान रहेको हुँदा सडकमा कराउनेहरूको कुनै काम नभएको जिकिर गरे।
‘प्रतिनिधिसभा विघटन भएर के हुन्छ?,’ उनले भने, ‘बोल्नलाई राष्ट्रियसभा छँदै छ नि! त्यहाँ पनि कांग्रेसका मान्छेहरू छन् र प्रचण्ड– नेपालका पनि कोही त होलान्।’

प्रमुख प्रतिपक्षी दलले भन्दा पनि जोडबलले प्रचण्डहरूले सरकारलाई असफल देखाउन अनेक प्रत्यन्त गरेपछि तथा काम गर्न नपाएपछि बाध्य भएर प्रतिनिधिसभा भंग गरी निर्वाचनमा जानु परेको मुख्यमन्त्री पोखरेलले दाबी गरे।

जनतामा जानु नै लोकतन्त्र भएको दाबी गरेका उनले जनताका बीचमा जान नचाहनेहरू नै अधिनायकवादीहरू भएको उनले टिप्पणी गरे।

‘कस्तो कुप्रचार हो यो,’ उनले भने, ‘ चुनावमा जानु भनेको अधिनायकवाद र तानाशाही रे। बरू चुनावमा जानुहुन्न भन्नेहरू नै तानाशाही हुन्।’

त्यही बहानामा नेपालको नयाँ नक्सा जारी भएपछि र त्यो नक्सा पारित गर्न संविधान संशोधन भएपछि केपी ओलीलाई हटाउने अभियान प्रचण्डले सुरू गरेको मुख्य मन्त्री पोखरेलले तर्क गरे।

पदका लोभी प्रचण्डले पूर्वएमाले कब्जाको अभियान थालेपछि समस्या भएको उनले बताए।

‘सुदूरपश्चिममा पार्टीको खाताको पैसा समेत प्रचण्ड–नेपालहरूले अन्तै राखेको कुरा सुनेका छौं,’ पोखरेलले प्रश्न गरे, ‘उहाँको नजर पार्टीको सम्पत्ति र जग्गा जमिनमा छ भने को कस्तो भन्ने स्पष्ट हुँदैन र।’

विघटित प्रतिनिधिसभामा खाली ठाउँ भएपछि त्यसमा माधन नेपाल अध्यक्ष बन्नु र प्रचण्ड संसदीय दलको नेतामा चयन हुनुले पनि उनीहरू कति पदका भोका रहेछन् भन्ने स्पष्ट हुने पोखरेलले तर्क गरे।

‘अब उहाँहरूको हैसियत चुनावमा गएपछि थाहा हुन्छ,’ पोखरेलले थपे, ‘अहिले त सडकमा जति गीत गाए पनि हुन्छ।’

उनले पार्टी वैधानिकताको सवालमा प्रथम अध्यक्षकै हस्ताक्षर निर्वाचन आयोगमा चल्ने र महासचिवले टिप्पणी उठाउने हुँदा स्वत: ओली पक्ष वैधानिक हुने दाबी गरे।

‘अब साढे ४ सय जनाले हैन १२ सय जनाको लाइनले वैधानिकता पुष्टि गर्छ,’ पोखरेलले भने, ‘किनकी निर्वाचन आयोगमा हामीले विस्तार गरेका १२ सय जना केन्द्रीय कमिटी निर्वाचन अयाोगमा दर्ता भइसकेको छ।’

मुख्यमन्त्री पोखरेलले आफूहरूले कसैलाई कारबाही नगरेको तर सदस्यता विस्तारमात्रै गरेको जिकिर गरे।

‘प्रचण्ड – नेपालले खाली ठाउँ पाउनासाथ केपी ओलीलाई कारबाही गरेको कुरा गर्नुभयो,’ मुख्यमन्त्रीले थपे, ‘तर, हमीले त्यसो गरेका छैनौं, प्रचण्डले अलिकति गडबढ गर्न थालेपछि कार्यकारी अध्यक्ष पद खोसेको मात्रै हो।’

उनले प्रचण्ड-नेपाल गल्ती भयो भन्दै सच्चिएर आए अझै पनि पार्टी एकता हुन सक्ने बताए।

तर, प्रचण्ड – नेपाल पार्टी एकता भंग गरेर अगाडि बढेको उनले आरोप लगाए।

केपी ओलीले नयाँ पुस्तालाई नेतृत्व हस्तान्तरणको घोषणा गरिसकेको भन्दै प्रचण्ड–नेपालहरू त्यहाँ जति पनि पाइन्छ त्यो आफैंलाई चाहिन्छ भन्ने प्रवृत्तिको भएको बताए।

आगामी मंसिरमा आफूहरूले अधिवेशन गर्ने भन्दै उनले कार्यकर्तालाई गाउँ–गाउँ र बस्तीबस्तीमा गएर संगठन विस्तारमा लाग्न आग्रह गरे।

५ वर्षमा जनताको बीचमा जानुपर्ने भए पनि ३ वर्षमै जनताको बीचमा जाँदा पुनः आफू अनुमोदन हुने अवसर समेत आएको मुख्यमन्त्री पोखरेलले बताए।

प्रचण्ड–नेपालको आरोप सही भए जनताले उनीहरूलाई अनुमोदन गर्ने नत्र खुल्याउने उनले तर्क गरे।

केपी ओलीको नेतृत्वमा पूर्वएमालेले ७० प्रतिशत जितेको र पूर्वमाओवादीले ३० प्रतिशतमात्रै जितेको हुँदा अबको परिणाम के हुन्छ ? भन्ने स्पष्ट भइसकेको उनले बताए।

स्रोत सेतोपाटी
नया नेपाली कमेडी भिडियो सखर चिनी हेर्नुहोस

Leave a Reply

Your email address will not be published. Required fields are marked *